श्री गंगा गोदावरी मंदिर (नाशिक)

 ancient (en), हिंदू मंदिर

नाशिकमधील रामकुंड येथे असलेल्या श्री गंगा गोदावरी मंदिराचे दरवाजे तब्बल १२ वर्षांनी उघडण्यात आले. भाविकांसाठी मंदिराचे दरवाजे ११ ऑगस्ट २०१६ पर्यंतच उघडे असतील नंतर पुन्हा एकदा १२ वर्षांसाठी मंदिराचे दरवाजे बंद होणार आहेत.
ही एक धार्मिक पंरपरा आहे. श्री गंगा गोदावरी मंदिराचे दरवाजे उघडल्यानंतर कुंभमेळ्याची सुरुवात होते. यंदा सिंहस्थ कुंभमेळा नाशिक आणि त्र्यंबकेश्वर येथे गोदावरी नदीकाठी सुरु झाला आहे. पुजारी एस. डब्ल्यू. जाधव आणि त्यांच्या सहका-यांनी मंदिराचे दरवाजे उघडले आणि देवी गोदावरी हिची विधीवत पूजा केली. या प्रसंगी भाविक मोठ्या संख्येने उपस्थित होते. पूजा झाल्यानंतर आतापर्यंत हजारो भाविकांनी देवी गोदावरी हिचे दर्शन घेतले आहे.
मंदिराचे दरवाजे १२ वर्षांसाठी बंद होतील त्यावेळी मंदिराबाहेरुनच भाविक प्रतिकात्मक पद्धतीने देवीची पूजा करतील. मंदिराचे दरवाजे पुन्हा उघडेपर्यंत म्हणजे तब्बल १२ वर्षे ही प्रतिकात्मक पूजा सुरु राहणार आहे.
श्री गंगा गोदावरी मंदिराजवळच देवी-देवतांची १०८ मंदिरे आहेत आणि रामकुंडही आहे. भाविकांसाठी हा परिसर अतिशय पवित्र आहे. रामकुंड येथे कपालेश्वर मंदिर आहे. शंकराच्या या मंदिरात प्रवेशद्वारावर नंदी ऐवजी एक बैल आहे. यासाठी एक कथा सांगितली जाते. शंकराला ब्रम्हहत्येच्या पापातून मुक्त होण्यासाठी रामकुंडात स्नान करण्याचा सल्ला नंदीने दिला होता. हा सल्ला देणा-या नंदीला शंकराने गुरुस्थान दिले होते, त्यामुळे या मंदिरात नंदी ऐवजी प्रवेशद्वारावर बैल आहे.
रामकुंड येथे वनवासाच्या काळात राम, सीता आणि लक्ष्मण यांनी मुक्काम केला होता आणि याच ठिकाणापासून ८ किमी. अंतरावर अंजनेरी येथे हनुमानाचा जन्म झाला होता, अशी भाविकांची श्रद्धा आहे.