ორხევის წმ. გრიგოლ ხანძთელის მამათა მონასტერი

 კულტურული მემკვიდრეობის ძეგლი/ეროვნული მნიშვნელობის ძეგლი, მართლმადიდებლური ეკლესია

ეკლესია მდებარეობს მდ. ფოლადაურისა და მარჯვენა შენაკად - ახქერფისწყლის ხერთვისში. ეკლესია მცირე ზომის დარბაზული ნაგებობაა, ფლეთილი ქვით ნაგები დუღაბზე. სწორკუთხა კარი სამხრეთიდან აქვს. ჩრდილოეთის გარდა, ყველა კედელში თითო ვიწრო სარკმელია დატანებული. დასავლეთის სარკმლის თავზე მცირე ზომის სწორკუთხა ნიშია გაკეთებული (ალბათ ჯვრისთვის) შებრტყელებულ აფსიდას მხოლოდ სამხრეთის სწორკუთხა ნიშა აქვს. კონქი მხრიდან გადაყვანილ ტრიუმფალურ თაღს უჭირავს. დარბაზის ცილინდრული კამარა კედლებზე დაყრდნობილ ბრტყელ თაღს ებჯინება.
ეკლესიის ფასადები სრულიად სადაა. დასავლეთის სარკმლის წირთხლში მეორადი გამოყენებით ჩასმულია სტელის ფრაგმენტი, რომელზეც ფონის დადაბლებით შექმნილ წრეში ჯვრის რელიეფური გამოსახულებაა მოცემული.
ეკლესია აღდგენილია და ამჟამად აქ მამათა მონასტერია.
აღდგენის შემდეგ დახურულია კრამიტით.
2006 წელს ეკლესიას მიენიჭა კულტურული მემკვიდრეობის ძეგლის სტატუსი.
ეკლესია/ორხევის მამათა მონასტერი:
memkvidreoba.gov.ge/objects/immovable/immovableObject?i...