Балота Марочна

 водна-балотнае ўгоддзе, аб'ект Рамсарскай канвенцыі

Балота Марочна — адно з трох буйнейшых верхавых балот, якія захаваліся ў натуральным стане на Палессі пасля асушальнай меліярацыі. Гэта самае старажытнае балота Беларусі — яго фарміраванне пачалося каля 10 тысяч гадоў назад.
16.03.2009 завершаны будаўнічыя работы па аднаўленні і стабілізацыі гідралагічнага рэжыму парушанага верхавога балота Марочна ў Столінскім раёне Брэсцкай вобласці.
Мерапрыемствы праводзіліся па праекце Праграмы развіцця ААН і Глабальнага экалагічнага фонду. Стабілізацыя гідралагічнага рэжыму Марочна павысіць прыродны патэнцыял тэрыторыі, стабілізуе і палепшыць умовы пражывання вялікай групы відаў рэдкіх раслін, птушак і жывёл, многія з якіх маюць глабальны і еўрапейскі прыродаахоўны статус і ўключаныя ў Чырвоную Кнігу Рэспублікі Беларусь.