ლვოვი

 ქალაქი, დედაქალაქის სახელმწიფო / პროვინცია / რეგიონი

ლვოვი (უკრ.: Львів, L’viv [ljviw], რუს.: Львов, L'vov; პოლ.: Lwów; გერმ.: Lemberg;
რუმ.: Liov; სომხ.: Լվով), უდიდესი ქალაქი დასავლეთ უკრაინაში, ლვოვის ოლქის ადმინისტრაციული ცენტრი, ასევე ცალკეული რაიონი ამავე ოლქში. ქალაქი მიჩნეულია უკრაინის ერთ-ერთ მთავარ კულტურულ ცენტრად. 2001 წლისთვის ცხოვრობდა 725,000 ადამიანი, რომელთაგან 88% უკრაინელი, 9% რუსი და 1% პოლონელი იყო, დამატებით 200 000 ადამიანი ყოველდღიურად შემოდიოდა გარეუბნებიდან.

ლვოვის მთავარი საგანმანათლებლო კერებია ლვოვის უნივერსიტეტი და ლვოვის პოლიტექნიკური. ქალაქშია ფილარმონიული ორკესტრი და ლვოვის ოპერისა და ბალეტის თეატრი. ისტორიული ცენტრი იუნესკოს მსოფლიო კულტურული მემკვიდრეობის ძეგლთა სიაშია შეტანილი და აქ მრავალი არქიტექტურული ღირსშესანიშნაობაა. 2006 წელს ქალაქმა დაარსებიდან 750 წლისთავი იზეიმა.