Vaikal Brammapureeswarar temple (Vaikal)

 temple, Shiva temple

 Upload a photo

.வைகல் என்றால் விடிகாலை, தங்குதல், என பொருள் பல விரியும்.

வைகல் தலம், சம்பந்தர் பாடல் பெற்ற தலங்களில் காவிரியின் தென்கரையில் அமைந்துள்ள 33ஆவது சிவத்தலமாகும். கும்பகோணம்-காரைக்கால் சாலையில் திருநீலக்குடி தாண்டி பழியஞ்சிய நல்லூரை அடைந்துதெற்கு நோக்கி மேலும் 2 கிமீ சென்றால் கோயிலை அடையலாம்.

இவ்வூரில் மூன்று சிவாலயங்கள் உள்ளன. முதலாவது கோயில் ஊரின் மையத்தில் உள்ள மாடக்கோயில், அடுத்து வடபுறம் உள்ள பிரம்மபுரீஸ்வரர். இது பிரம்மனால் பூஜிக்கப்பட்டது.கிழக்கு பகுதியில் உள்ள விஸ்வநாதர். இது திருமால் வழிபட்ட பெருமைக்குரியது.

இப்போது நாம் வடபுறம் உள்ள பிரம்மபுரீஸ்வரர் திருக்கோயிலை பார்ப்போம்.

ஒருகாலத்தில் பெரும் அந்தணர் வாழ் நகரமாக இருந்த இவ்வூர் தற்போது சிறிய கிராமமாக சரியான போக்குவரத்து வசதி இல்லாமல் உள்ளது.

கிழக்கு மேற்கில் மூன்று தெருக்களும் தெற்கு வடக்கில் மூன்று தெருக்களும் கொண்டு நான்கு பாகமாக பிரிக்கப்பட்ட ஒரு சதுரம் போல் உள்ளது. இதில் வடபுறம் ஒரு பெரிய குளத்தின் கரையில் பிரம்மபுரீஸ்வரர் கோயில் உள்ளது. கிழக்கு மேற்கில் நீண்ட சதுரமாக கோயில் கோட்டையை போல் உள்ளது. சில படிகள் ஏறிப்போய் கோயிலை அடையவேண்டும். கிழக்கில் ஒரு சிறிய வாயில் இருப்பினும், பிரதான வாயில் தென்புறமே உள்ளது. பிரம்மன் வழிபட்டதால் இறைவனுக்கு பிரம்ம புரீஸ்வரர் என பெயர். அம்பிகை தென்புறம் நோக்கியுள்ளார்.

இறைவனின் எதிரில் கம்பீரமான கொடிமரம் ஒன்று செப்பு சட்டை அணிந்து நிற்கிறது. கோயில் வளாகத்தில் அரிய பல வாகனங்கள் உள்ளன. பல்லாண்டு காலம் இறைவனை சுமந்த சகடையொன்று இறைவனை சுமந்த வாகனம் வருமா வருமா என வாயிலிலேயே நிற்கிறது.

கோயில் உயர்ந்த மதில் சுவர் கொண்டதாயினும் சிதைந்து பல இடங்களில் வீழ்ந்து கிடப்பதை காணமுடிகிறது. கோயில் வளாகம் முழுவதும் செடிகொடிகள் மண்டி கிடக்கின்றன. சுற்றிவர வழியில்லை. முறையான பூஜை ஏதும் இன்றி நாட்கள் நகர்ந்துகொண்டிருக்கின்றன.

கருவறை கோட்டத்தில் தென்முகன்,லிங்கோத்பவர், பிரமன் துர்க்கை உள்ளனர். அர்த்த மண்டபத்தில் நால்வர் உள்ளனர்.

பிரகார சிற்றாலயமாக விநாயகர், முருகன் மட்டும் உள்ளனர். வடகிழக்கில் நவகிரகம் உள்ளது.