Manaparavai Sivan Temple & Pond

 Shiva temple  Add category

குடவாசல்- வலங்கைமான் சாலையில் உள்ள ஊர் தான் இந்த மனப்பறவை, மணபரவை என இரு வேறு உச்சரிப்புக்கள்.

பரவை என்பதற்கு திடல் எனும் பெயர் உண்டு, மணல் பரவை என்பதற்கு மணற்பரப்பு என கொள்ளலாம்.

குடவாசலில் இருந்து வலங்கைமான் சாலையில் மூன்று கிமி தொலைவில் உள்ளது இவ்வூர். . இங்கு கிழக்கு நோக்கிய சிவாலயம் ஒன்று அமைந்துள்ளது. பழமையான கோயில் சிதைந்துவிட புதிய கோயில் உருவாகியிருக்கிறது.

கோயில் என்பது பொதுவில் உள்ள இடம், பலரும் கலந்து அளவளாவ ஓர் இடம் தானே அதனால் தானோ என்னவோ இவ்வூரின் நெல் கொள்முதல் நிலையம் இங்கே கோயிலை அடைத்தபடி செயல்படுகிறது. சாக்கு பைகளும், சணல் பந்துகளும் அடுக்கி வைக்கும் இடமாகவும், மேஜை நாற்காலி போட்டு கணக்கு பார்க்கும் அலுவலகமாகவும் இருந்து வருகிறது.

புதிய கோயிலல்லவா தரை முழுவதும் பீங்கான் கற்கள் பதிக்கப்பட்டு உள்ளன.

இறைவன் விஸ்வநாதர் கிழக்கு நோக்கியும், இறைவி விசாலாட்சி தெற்கு நோக்கியும் உள்ளார். இறைவன் கருவறையை ஒட்டியவாறே விநாயகர், முருகன் சிற்றாலயங்கள், முகப்பில் பெரிய தகர கொட்டகை போடப்பட்டுள்ளது.

கருவறை கோட்டத்தில் தென்முகன், லிங்கோத்பவர், பிரம்மன், துர்க்கை உள்ளனர். சண்டேஸ்வரர் பழமையானவர் பெரிய திருமேனியாக உள்ளார். அம்பிகை கருவறையை ஒட்டியபடி ஒரு பெரிய லிங்கம் தனித்துள்ளது.