संत्रा पॅकेजिंग प्रकल्प, मायवाडी

 उत्पादन  गट निवडा

 Upload a photo

मोर्शी तालुक्याच्या मायवाडी येथील बंद पडलेल्या संत्रा पॅकेजिंग प्रकल्पाला महाऑरेंजने संजीवनी दिल्याने या परिसरातील संत्रा उत्पादक शेतकऱ्यांना दिलासा मिळाला आहे.

मायवाडी येथील प्रकल्प तब्बल दोन दशकांपासून बंद अवस्थेत होता. या काळात प्रकल्प परिसराला झुडपी, जंगलाचे स्वरूप आले तर, यंत्र सामुग्री धुळखात पडली होती. स्थानिक पातळीवर प्रकल्प चालवण्याचे प्रयत्न झाले पण, त्यास यश आले नाही. अखेर महाऑरेंजचे कार्यकारी संचालक श्रीधर ठाकरे व संचालक मनोज जौंजाळ यांनी सरकारकडे डिसेंबरमध्ये प्रयत्न केले. कृषिमंत्री पांडुरंग फुंडकर यांच्याशी चर्चा केल्यानंतर हा प्रकल्प लिजवर देण्यात आला. प्रकल्प सुरू करण्यात आल्यानंतर पत्रकारांना याबाबत माहिती देण्यात आली. ग्रेडिंग, कोटिंग व व्हक्सिंगची यंत्रसामुग्री नादुरुस्त स्थितीत होती. त्याला दुरुस्त करून दर तासाला तीन टन संत्र्यावर प्रक्रिया करण्यात आली. आतापर्यंत एक हजार टन संत्र्यावर प्रक्रिया करून सुमारे ६०० टन संत्री बांगलादेश तर, ४०० टन संत्री ऑल फ्रेश कंपनीमार्फत विकली. या प्रकल्पाचा लाभ परिसरातील सुमारे दोनशे शेतकऱ्यांना झाल्याची माहिती ​श्रीधर ठाकरे व मनोज जौंजाळ यांनी पत्रकारांना दिली.

या केंद्राच्या माध्यमातून शेतकरी ते थेट खरेदीदार असे प्रयत्न करण्यात आले. त्यामुळे मध्यस्थांना वाव नाही. कळमनापेक्षा १५ ते २० टक्के अधिक भाव शेतकऱ्यांना मिळाला. उच्च प्रतीच्या भावानुसार संत्री खरेदी करून नंतर त्याचे ग्रेडिंग करण्यात आले, अशी श्रीधर ठाकरे यांनी स्पष्ट केले.