Katedralja / Bazilika B

 cathedral (en), basilica (en), ruins (en)

Katedralja e Bylisit, e përbërë nga bazilika, baptisteri dhe pallati peshkopal, është monumenti më i madh i qytetit për Antikitetin e Vonë dhe një nga shembujt më të spikatur të monumenteve të kultit paleokristian. Bazilika është tre nefëshe, me absidë, transept, narteks, ekzonarteks dhe portikët e atriumit, të kurorëzuara me galeri. Pallati peshkopal, pjesërisht i gërmuar, lokalizohet në juglindje të Katedrales. Pjesë të kompleksit peshkopal janë edhe magazina me pitosa të mëdhenj, një punishte e vogël për prodhimin e verës që përdorej për nevojat e kompleksit, si dhe ambientet e shërbimit. Skulptura dekorative kryesisht është prej guri gëlqeror të marrë nga gurorja e Bylisit dhe prej mermeri të importuar. Një nga vlerat më të mëdha të tij përbëjnë sipërfaqet e mëdha të dyshemeve të shtruar me mozaikë (400 m2), me motive dhe skena të larmishme. Aty gjejmë skena nga jeta e peshkatarëve të Nazaretit, si ajo e vëllezërve Simon dhe Andrea dhe skena pastorale me barinj. Gjatë ekzistencës së saj katedralja ka njohur tri faza të rëndësishme ndërtimi: e para, në fundin e shek. IV m. Kr. ose fillimin e shek. V m. Kr.; e dyta rreth vitit 470 m. Kr., dhe e fundit lidhet me periudhën e sundimit të Justinianit, para vitit 547 m. Kr., kur bazilika u dogj gjatë dyndjeve sllave.

Tabela, Janar 2022: i.imgur.com/eSP4KWo.jpeg