Bazilika A

 basilica (en), ruins (en)

Bazilika A përfaqëson një kishë paleokristiane tre nefëshe, me absidë gjysmë rrethore dhe transept trepjesësh. Pjesët përbërëse të monumentit janë ngritur në nivele të ndryshme, duke u ngjitur gradualisht nëpërmjet një shkallareje në portik, narteks dhe më pas në naos. Dimensionet maksimale të këtij ansambli monumental janë rreth 38 metra gjatësi dhe 23 metra gjerësi. Gjendja e ruajtjes së këtij monumenti lejon të përcaktohen elementët planimetrikë dhe vëllimorë. Nefet ndahen nga njëri-tjetri me arkada të ngritura mbi shtylla të gurëzuara dhe këto të fundit mbi një stilobat të lartë. Hapësirat midis shtyllave kanë qenë të mbyllura me parapete. Në bazën e absidës gjysmë rrethore gjenden gjurmët e sinthronit me tri shkallë. Para tij është ruajtur bazamenti i tavolinës së altarit dhe relikeri në formë kryqi. Dyshemeja e sanktuarit, nefit qendror dhe verior, krahu verior i transeptit dhe narteksi janë shtruar me mozaikë shumëngjyrësh, me motive të pasura gjeometrike, floreale dhe zoomorfe. Gërmimet arkeologjike në monument kanë zbuluar një koleksion të pasur të skulpturës dekorative - kapitele, kapitel imposte, korniza etj. - të punuara në gur gëlqeror të marra nga gurorja e Bylisit. Vetëm tavolina e altarit e fazës së dytë dhe kolonetat janë prej mermeri. Bazilika është ndërtuar në gjysmën e parë të shek. V m. Kr. dhe është djegur gjatë dyndjeve sllave në mesin e shek. VI m. Kr.

Tabela, Janar 2022: i.imgur.com/BHLJzDx.jpeg