Tempulli | interesting place (en)

 interesting place (en)  Add category

Tempulli, prej të cilit sot duken vetëm blloqet e themeleve, ngrihet mbi një podium që nga veriu mbështetet mbi murin mbajtës të Rrugës së Shenjtë. Nga lindja ai sheh drejt agorasë, kurse fasada e tij perëndimore, mjaft e dëmtuar, dominon skajin verior të portikut me 17 nishe. Ky i fundit ka pësuar një ndryshim duke u përshtatur për mbajtjen e themeleve të tempullit. Përmasat: 16x11.5m. Datimi: Gjysma e dytë e shek. II para Krishtit, me një modifikim të mundshëm në shek. II e.s. Është një tempull peripter sine postico (pa kolonadë në fasadën e mbrapme) i ordrit korintik. Ai paraprihet nga një shkallare monumentale që ka dy faza. Vetë shkalla paraprihet nga një kanalizim me tulla që shërben për evakuimin e ujrave që rrjedhin nga kodra. Nga mbrapa shpalosej kolonada e pronaosit që dominonte hyrjen e qelës së ndarë në tri nefe. Në mungesë të ndonjë mbishkrimi nuk mund të thuhet me saktësi se cilës hyjni i ishte kushtuar. Por duke u nisur nga pozita strategjike në hyrje të agorasë dhe mënyra e ndarjes së qelës në tri nefe mund të jenë argumenta për praninë e një Kapitoli (tempull i kushtuar Jupiterit, Junës dhe Minervës).