Biblioteka

 interesting place (en)  Add category

Kjo ndërtesë me planimetri thuajse katrore (11.05x11.42m), që ka një hyrje të vetme ballore, është ndërtuar mbi një portik të mëhershëm dorik. Absidat e portikut bashkë me murin fundor të periudhës helenistike i brendashkruhen objektit. Prania e një bankine që mbështetet në paretin e brendshëm dhe që mund të ketë shërbyer për vendosjen e rafteve me libra është argumenti i vetëm i arkeologëve për ta identifikuar ndërtesën si bibliotekë. Pavarësisht nga kjo ekzistenca e një biblioteke në Apoloni është pothuajse e sigurt, ashtu si në Dyrrachium (Durrës), ku një mbishkrim e vërteton këtë. Për vetë konkurrencën dhe rivalitetin që ka ekzistuar gjithmonë midis këtyre dy qyteteve në antikitet, vështirë që Apolonia të mos kishte bibliotekë. Mund të mendohej se ndërtesa mund të ketë qenë një Augusteum (hijerore dedikuar kultit perandorak), sepse bankina mund të ketë shërbyer për të mbajtur statujat e perandorëve, siç është rasti i një ndërtese me planimetri të ngjashme në Narona (Kroaci). Por kjo është e vështirë të vërtetohet, pasi gjatë gërmimit Leon Rey nuk gjeti aty asnjë statujë. Si të gjitha monumentet kryesore të qendrës monumentale ndërtesa datohet në shek. II-III e.s.