Dyqanet | interesting place (en)

 interesting place (en)  Add category

Përgjatë rrugës qendrore gjendeshin një varg dyqanesh të nxjerra në dritë nga gërmimet franceze në vitet 1924-1938. Gjatësia: 52m, gjerësia: 5m. Ndërtimi i këtij kompleksi është bërë në disa faza, e fundit prej të cilave datohet në kohën e lulëzimit të madh të qytetit në shek. II-III e.s. Disa gjurmë të gjetura në anën tjetër të rrugës dëshmojnë praninë e një strukture tjetër simetrike me kompleksin. Skajet e kësaj strukture ende nuk janë zbuluar plotësisht: nëse në perëndim dhe në veri rruga shërben si kufi, në lindje dhe në jug gërmimet kanë qenë të pamjaftueshme për të përcaktuar formën dhe kufijtë e plotë. Disa gjurmë të rreshtave me tulla e gurë tregojnë për ekzistencën e ndarjeve në kthina. Leon Rey pohonte edhe praninë e një kati të dytë, por gjurmë shkallësh nuk ka. Shquhen qartë katër pragje ku dallohen dhe pozicionet ku kanë qenë të vendosura dyert. Struktura të tilla janë të krahasueshme me ato të qyteteve të mëdha të asaj kohe, si Pompei apo Ostia, duke bërë që i gjithë ansambli të identifikohet si një kompleks dyqanesh.