Koothali Gramapanchayath

 ફોટો અપલોડ કરો

കോഴിക്കോട് ജില്ലയിലെ കൊയിലാണ്ടി താലൂക്കില്‍ പേരാമ്പ്ര ബ്ളോക്കിലാണ് കൂത്താളി ഗ്രാമപഞ്ചായത്ത്. സ്ഥിതി ചെയ്യുന്നത്. കൂത്താളി വില്ലേജില്‍ പൂര്‍ണ്ണമായും പേരാമ്പ്ര വില്ലേജില്‍ ഭാഗികമായും വ്യാപിച്ചുകിടക്കുന്ന കൂത്താളി ഗ്രാമപഞ്ചായത്തിനു 14.13 ചതുരശ്രകിലോമീറ്റര്‍ വിസ്തീര്‍ണ്ണമുണ്ട്. ഈ പഞ്ചായത്തിന്റെ അതിരുകള്‍ വടക്കുഭാഗത്ത് ചങ്ങരോത്ത് പഞ്ചായത്തും, കിഴക്കുഭാഗത്ത് ചക്കിട്ടപ്പാറ പഞ്ചായത്തും, തെക്കുഭാഗത്ത് പേരാമ്പ്ര, കായണ്ണ പഞ്ചായത്തുകളും, പടിഞ്ഞാറുഭാഗത്ത് പേരാമ്പ്ര, ചങ്ങരോത്ത് പഞ്ചായത്തുകളുമാണ്. കൂത്താളി എന്ന സ്ഥലനാമം “കൂത്താട്ടുപള്ളി” എന്നതു ലോപിച്ചുണ്ടായതാണെന്നും, അതല്ലാ, “കൂത്ത്, ആളി” എന്നീ പദങ്ങളില്‍ നിന്നു ആവിര്‍ഭവിച്ചതാണെന്നുമുളള വ്യത്യസ്ത വ്യാഖ്യാനങ്ങള്‍ നിലവിലുണ്ടെങ്കിലും “കൂത്താളി”യില്‍ “കൂത്ത്” എന്ന കലാരൂപവുമായുള്ള ബന്ധം അടങ്ങിയിട്ടുണ്ടെന്നത് പ്രാചീനകാലം മുതലേ ഈ പ്രദേശത്തിനു കലയുമായുണ്ടായിരുന്ന ഗാഢബന്ധത്തെ സൂചിപ്പിക്കുന്നു. പഴയ മലബാര്‍ ജില്ലയിലെ കുറുമ്പ്രനാട് താലൂക്കിലെ പിള്ളപെരുവണ്ണ, വള്ളിപ്പറ്റ, പന്നിക്കോട്ടൂര്‍ മലവാരങ്ങളുള്‍പ്പെടെ 33000 ഏക്കര്‍ വിസ്തീര്‍ണ്ണം വരുന്നതും, വയനാട് ജില്ലാതിര്‍ത്തിയായ തരിയോടു വരെ വ്യാപിച്ചുകിടക്കുന്നതുമായ പേരാമ്പ്ര പഞ്ചായത്ത് 1956-ലാണ് രൂപീകരിക്കപ്പെടുന്നത്. കൂത്താളിയിലെ ഒടുവിലത്തെ നാടുവാഴിയുടെ മകനായിരുന്ന ഒ.ചന്തുമേനോന്‍ ചെയര്‍മാനായി രൂപീകൃതമായ പഞ്ചായത്ത് ഡീലിമിറ്റേഷന്‍ കമ്മറ്റി റിപ്പോര്‍ട്ടിന്റെ അടിസ്ഥാനത്തില്‍ കൂത്താളി, പൈതോത്ത്, പനക്കാട് എന്നീ ദേശങ്ങള്‍ കൂടി പേരാമ്പ്ര പഞ്ചായത്തില്‍ (നിലവിലുള്ള പേരാമ്പ്ര പഞ്ചായത്തല്ല) കൂട്ടിച്ചേര്‍ത്തുകൊണ്ട് കൂത്താളി പഞ്ചായത്ത് എന്ന പേരില്‍ നിലവിലുള്ള പഞ്ചായത്ത് പുനഃസംഘടിപ്പിച്ചു. പഴയ ഭരണസമിതി 1962 ഡിസംബര്‍ വരെ ഭരണത്തിലുണ്ടായിരുന്നു. 1963 ജനുവരി മുതല്‍ ഡിസംബര്‍ 31 വരെ സ്പെഷ്യല്‍ ഓഫീസറുടെ ഭരണത്തിന്‍ കീഴിലായിരുന്നു ഈ പഞ്ചായത്ത്. പഴയ കുറുമ്പ്രനാട് താലൂക്കില്‍ പെട്ട കല്ലോടംശത്തിന്റെയും പേരാമ്പ്ര അംശത്തിന്റെയും ഏതാനും ഭാഗങ്ങള്‍ ചേര്‍ന്നതാണ് ഇന്നത്തെ കൂത്താളി ഗ്രാമപഞ്ചായത്ത്. പഞ്ചായത്തില്‍ കൂടി ഒഴുകുന്ന ചെറുപുഴയുടെ കിഴക്കും പടിഞ്ഞാറുമായി കൂത്താളി പഞ്ചായത്തിലെ വാര്‍ഡുകള്‍ സ്ഥിതി ചെയ്യുന്നു.