Hamami (Vushtrri)

 bathhouse (en)  Add category

dtk.rks-gov.net/tkk_objekti.aspx?id=8706

Hamami i Gazi Ali Beut gjendet në bërthamën e qendrës së vjetër të qytetit të Vushtrrisë. Hamami i Vushtrrisë është ndërtuar nga Gazi Ali Beu në fund të shek. XIV dhe fillim të shek. XV. Objekti sanitar publik kishte funksion banjoje, e cila ishte në shërbim për të dy gjinitë. Hamami paraqet një objekt kompleks teknik për sa i përket zgjidhjes hidraulike dhe termoteknike. Hamami i Vushtrrisë i takon tipit të Hamameve “Tek” dhe përmban sallën e madhe në hyrje me shatërvanin nga guri në mes, sallën e dytë (pjesa e vakët dhe nyja sanitare, dhe dy kthina (halvete) për larje përballë njëra-tjetrës. Në këto hapësira gjendeshin dy vaska (kurna) guri me ujë të ngrohtë që vinte nga depo. (Shtylla, 1998, f. 38-39) Skema e banjës e këtij Hamami është e ngjashme me Hamamin në Pejë - seksionin e grave. Duket qartë që hamami u ndërtua në dy periudha. Hyrja e ndërtuar nga gurët poroz vullkanik - gurë shtufi është ndërtuar në shek. XVII. Një periudhe më të hershme i përkasin dyshemeja dhe tri kupolat e ulëta (Shtylla, 1998, f. 38-39). Ambienti i fundit i hamamit zë gjithë gjerësinë e objektit. Ambienti i hyrjes paraqet një volum kubik që mbulohet nga sipër me kupolë masive sferike me tambure tetë këndore. Pjesa më e hershme është volumi përdhesë me tre kupolat e ulëta ku janë ambienti i ndërmjetëm, dy ambientet e larjes dhe depozita e ujit (Shtylla, 1998 f. 39). Pullazi është i ndërtuar në formë kupole. Ambientet e Banjos ishin të shtruara me gurë mermeri të bardhë (Fejza, et.al. 2003, f. 482-483). Gjithashtu Mulaku pohon se lokalet e hamamit kanë qenë të shtruara me mermer të bardhë (Mulaku, 2004, f. 60). Hapësira e garderobës sot nuk eksizton. Në sallën e madhe kanë qenë katër shtretër për pushim pas daljes nga banja (Mulaku, 2004, f. 60). Nga vitet ’70 objekti është jashtë funksionit. Në vitin 2013 (gusht) ka filluar restaurimi dhe konservimi i fasadës dhe kupolave të Hamamit, punime të cilat kanë përfunduar në muajin Maj 2014.