Teqeja e Helvetive (Berat)

 cultural heritage / national heritage (en), khankah/ ribat/ zawiya/ tekke (en)

Teqeja e Helvetive është një monument i cili paraqet një nga realizimet më të mira të arkitekturës në qytetin e Beratit. Teqeja është ndërtuar në shek XV dhe rindërtuar nga Ahmet Kurt Pasha në fund të viteve 70 të shekullit XVIII dhe i përket sektit të helvetike, të cilët janë një nga sektet e islamit dhe i shërbejnë një grupi të caktuar.

Ajo është ndërtuar në lindje të Xhamisë Mbret, e rrethuar nga një oborr, në një tërësi me konakët. Përbehet nga salla e lutjeve dhe nga një portik i hijshëm, i cili paraprin hyrjen për në sallë. Dy dollapë në mur lindor, si dhe një pritë që lidhet me një mjedis të vogël ndihmës. Në anën veriore dhe lindore salla e lutjeve ka një mafil-ballkon. Mafil-ballkon ka në anën e poshtme tavan të lakuar në formë çerek-rrethi. Ndodhet gjithashtu dhe mauzoleja e varrimit të pashait dhe të birit të tij. Ajo që të befason është tavani i saj i ndërtuar me dru i dekoruar me piktura, të cilat vlerësohen si me të bukurat e kohës së vet.

Po të shikoni me kujdes në murin e kësaj godine do të vëreni disa vrima të vogla. Këto vrima shërbejnë për akustikën e zërit, gjë që tregon se objekti është ndërtuar me mjeshtëri të lartë e cila është punuar në flori.

Në anën jugore të objektit ruhen konakët e banimit të dervishëve, rindërtim i shekullit XIX. Pjesa e mbetur paraqet një ndërtesë të gjatë dykatëshe me bodrume. Ka çardak mbi shtylla druri dhe konakët në pjesën e sipërme. Interesant është fakti se nën këtë godinë ndodhet një kanal, i cili mbledh ujërat e kodrës dhe i derdh në lumin Osum. Ky ndërtim është ndërtuar nga Ahmet Kurt Pasha. Këto konakë kanë shërbyer si hane për besimtarët që vinin për të bërë ritet fetare, si dhe për nxënësit që studionin në medrese. Në këto konakë tani ndodhen zyrat e Drejtorisë Rajonale të Monumenteve të Kulturës – Berat.