ქაჩუს ციხე

 კოშკი, საინტერესო ადგილები

მდებარეობს შატილიდან ჩრდილო-აღმოსავლეთით 1,5 კმ-ის დაშორებით, მაღალი მთის განშტოების კიდეზე. თარიღდება გვიანდელი შუა საუკუნეებით.
ციხე შედგება გვერდიგვერდ განლაგებული ოთხი ციხე-სახლისაგან, რომლებიც ერთიან თავდაცვით სისტემას ქმნიან და ერთმანეთს უკავშირდებიან ვიწრო გასასვლელებით. კომპლექსი ნაგებია კლდის ფლეთილი ქვებით. წყობა მშრალია. სამხრეთ ნაწილში ორი ციხე-სახლია. მათ შორის გადასასვლელია. აღმოსავლეთით მდგარი ციხე-სახლი სამსართულიანია. გეგმით ხუთკუთხაა. შუაში დგას ქვის მასიური სვეტი. პირველ და მეორე სართულზე არსებული თაღოვანი შესასვლელი სამხრეთ კედელშია. პირველ სართულზე ორი ნიში და ორი სათოფურია. მეორე, დასავლეთით მდგარი ციხე-სახლი ოთხსართულიანია. გეგმით ოთხკუთხა. სამხრეთი კედლის პირველ, მეორე და მესამე სართულებზე კარია. მეორე და მესამე სართულზე სათოფურები და ნიშებია. მეორე სართულის დასავლეთი კედლის შუა ნაწილში დიდი ღიობია. კომპლექსის ჩრდილოეთ ნაწილში მდგარი ციხე-სახლის აღმოსავლეთი ნაწილი გეგმით ტრაპეციულია. პირველ და მეორე სართულებზე, გარდა სამხრეთ კედელში გაჭრილი შესასვლელებისა, რამდენიმე სარკმელი, ნიში და სათოფურია. დასავლეთის ციხე-სახლის სამხრეთ კედელში ორივე სართულზე ნიშები, სარკმელები და სათოფურებია. ნაგებობის შუაში ქვის მასიური სვეტია. სამხრეთ კიდეში მდგარ ციხე-სახლებზე მიშენებულია სამსართულიანი ნაგებობა, რომელიც რელიეფს მიუყვება. შესასვლელი აღმოსავლეთ კედელშია, მიწიდან 3,25 მ სიმაღლეზე. კედლებში ნიშები, სათოფურები და სარკმელებია.
იხ.სურათებით " ქაჩუს ციხე": memkvidreoba-gis.gov.ge/Home/Immovable/14690
highlander-ge.livejournal.com/187406.html