Şahsevənlər məscidi (Gəncə)

 məscid  Add category

Şahsevənlər məscidi Arran memarlıq məktəbinə uyğun olaraq qırmızı kərpicdən Şahsevənlər məhəlləsində, məhəllə cammatının vəsaiti hesabına 1880-1882-ci illərdə inşa edilmişdir.
Məscidin minarəsi olmasa da, minarəni məscidin quzey divarlarında özünəməxsus tikilmiş və günbəzin lap yuxarı hissəsinə kimi uzanan pillələr əvəz edir.
Məscidin bünövrəsi də daxil olmaqla bəzi yerləri çay daşından və bütün binası, eləcə də gümbəzi bişmiş qırmızı kərpicdən inşa edilmişdir. Məscid qadınlar və kişilər bölməsi olmaqla iki hissəyə ayrılıb. Qadınlar olan bölmə iki mərtəbəlidir və ikinci mərtəbənin məhəccəri amfiteatr formasındadır. Məscidin bir girişi və tağvari 10 pəncərəsi var. Mehrabın ətrafında 12 imamın adı yazılmışdır. Məscidin gümbəzi 8 ədəd tağ şəkilli divar üstündə dayanıb, diametri 12 metrdir və döşəmədən günbəzədək hündürlüyü 10 metrdir.
Sovetlər dövründə ateizmin təbliği olduğu bir dövrdə bu məsciddən yaşayış evi və kitabxana kimi istifadə edilib.
1970-ci ildə təmir-bərpa işləri aparıldıqdan sonra məscidin binasında “Xəzinə” adlı kitabxana yaradılaraq məhəllə əhalisinin istifadəsinə verilir.
Azərbaycan müstəqillik əldə etdikdən sonra 1994-cü ildən bəri məscidin fəaliyyəti bərpa edilərək məhəllə əhalisinin istifadəsinə verilir.