Смрдлива Вода

 излетничко место, скијачки центар

Името потекнува од минералната вода која извира овде, со мирис на расипани јајца.
Смрдлива Вода е туристички локалитет на Кожуф Планина кој се наоѓа на надморска височина од 850 м. и на 24 км оддалеченост од градот Гевгелија. Познат е по минералната вода и нејзината лековитост за стомачни и заболувања на желудникот и бубрезите. Во шумовитите предели се изградени 400 викендички и хотел за сместување на гостите.

************************************************************************************

Туристичкиот локалитет Смрдлива Вода, се наоѓа на надморска височина од 850 метри, а од градот Гевгелија е оддалечен 24 километри. Го зафаќа просторот помеѓу врвовите Флора, Аџибарица, Белези и селото Коњско. Познат е по минералната вода и нејзината лековитост за стомачни и заболувања на желудникот и бубрезите.

Атрактивно - рекреативни објекти

- Минерални извори кај народот познати како „Смрдлива вода“ од каде што и целиот локалитет го добил своето име. Се нарекуваа така поради непријатната миризба на водата на „расипано јајце“. По својот хемиски состав се хидрокарбонатни, минерализирани, слабо кисели води. Се користат преку пиење за лекување на стомачните заболувања, потоа камен во бубрегот, песок и поситен камен во мочните патишта, воспаление во мочните органи и сл. Чистиот планински воздух и лековитоста на водата придонеле таа да се користи од локалното население уште меѓу двете светски војни, а по втората светска војна се изградиле и сместувачки локалитети за сместување и престојување на посетителите.

- Терени погодни за развој на планинарењето и спортот, особено во месноста Аџибарица, односно во изворишниот дел на реката Цреша.

- Пространи дабови и букови шуми.

- Квалитетна клима и разновиден дивеч, меѓу кои како раритет се јавува и еленот.

Гол човек (Arbutus andrachne)
Посебна атракција за туристите во близина на Смрдлива Вода е дрвото „гол човек“, ендемичен вид растение, единствено зимзелено дрво што два пати годишно ја менува својата црвеникава и лушпеста кора. Кога се допира, се има чувство како да се допира нежна човечка кожа. Лисјата му се јајцевидни, а цветовите распоредени како гроздови.

Присуство на злато во Коњска Река
Присуството на злато во Коњска Река и нејзините притоки, односно златоносен песок претставува ретка појава во Македонија. Премивањето на злато во минатото овде било доста развиено, па тоа може и денеска да се обнови и ќе претставува особена атракција. Реката Цреша, во својот средишен дел од текот, изградила една доста интересна кањонеста долина чија десна страна е позната под името Порта Алева Кечикај. Кечикај се одликува со мошне стрмни карпи чија височина достигнува и до 500 метри во вертикала. Тоа се доста поволни терени за алпинизам. Наведените разновидни атрактивно-рекреативни елементи овозможуваат развој на повеќе видови туризам: здравствен, летувачки, ловен, излетнички и алпинистички.