Нежилово, Богомила

Во подножјето на планината Јакупица, на 60 километри југозападно од Велес, се наоѓа селото Нежилово. Околината на селото се смета за еден од најубавите природни предели во регионот. Таа изобилува со густа букова и дабова шума, пространи ливади и пасишта.

Селото плени со специфичната рурална архитектура, во која доминираат куќи од камен, претежно изградени на два ката. Во близина на Нежилово се наоѓаат рудници за бел мермер и кварц, а особен интерес предизвикува рибникот во кој се одгледува калифорниска пастамрка.

Во непосредна близина на селото се наоѓа планинарскиот дом Чеплес како и атрактивните извори на реката Бабуна, варовнички предел во кој жителите произведуваат варовник на традиционален начин. Нежилово има големи потенцијали за развој на планинскиот, рекреативниот, здравствениот и хербалниот туризам како и ловот и риболовот.